15.08.2013 - урачыстасць Унебаўзяцця Найсвяцейшай Панны Марыі

Лк 1, 39–56

Сабраўшыся, Марыя ў тыя дні паспяшыла ў горную краіну, у горад Юды. І ўвайшла ў дом Захарыі, і прывітала Альжбету.

Калі Альжбета пачула прывітанне Марыі, узварухнулася дзіцятка ва ўлонні яе, і напоўнілася Альжбета Духам Святым. І ўсклікнула моцным голасам, і сказала: Благаславёная Ты між жанчынамі і благаславёны плод улоння Твайго! Адкуль мне гэта, што Маці Пана майго прыйшла да мяне? Бо калі голас прывітання Твайго загучаў у вушах маіх, узварухнулася ад радасці дзіцятка ва ўлонні маім. І шчаслівая тая, якая паверыла, што споўніцца сказанае Ёй Панам.

У тыя дні сказала Марыя:

Велічае душа мая Пана,

і ўзрадаваўся дух мой у Богу, маім Збаўцы.

Бо ўзглянуў Бог на пакору сваёй слугі,

і цяпер благаслаўляць мяне будуць усе пакаленні.

Бо вялікае ўчыніў мне Усемагутны,

а імя Яго святое.

І міласэрнасць Яго з пакалення ў пакаленне

над тымі, хто Яго баіцца.

Паказаў моц сваёй правіцы,

рассеяў тых, хто пыхлівы сэрцам.

Скінуў магутных з трону

і ўзвысіў пакорных.

Дабром галодных насыціў,

а багатых ні з чым адправіў.

Прыняў свайго слугу Ізраэля,

памятаючы пра сваю міласэрнасць,   

як абяцаў бацькам нашым,

Абрагаму і яго патомству навекі.

І прабыла Марыя ў Альжбеты каля трох месяцаў, і вярнулася ў дом свой.

“Велічае душа мая Пана…” Марыя славіць Бога як Госпада і Правадыра гісторыі збаўлення, які кіруе падзеямі на шляхах свету. Гэта Ён прыніжае тых, якія лічацца магутнымі, узвышае тых, з якімі ніхто не лічыцца. Яе добраахвотнае прыніжэнне перад абліччам Пана выклікана ўдзячнасцю за вялікі дар, якім з’яўляецца Яе ўдзел у Божых планах. Усведамляючы сваё духоўнае ўбоства, Марыя праслаўляе Бога «праз» Сына, «у» Сыне і «з» Сынам…

Гімн Марыі — гэта адказ Божага народа — а, значыць, і Царквы — на вялікія справы, здзейсненыя Госпадам у Дзеве і на працягу ўсіх вякоў. У Царкве гэты спеў становіцца працягам святочнай радасці народа Старога Запавету, які ўспамінае Бога вялікага, Бога, які любіць свой народ, міласэрнага, ласкавага, святога, справядлівага і ўсемагутнага. Ён з’яўляецца Творцам, Збаўцам і Панам свету і гісторыі…

А я – ці слаўлю Госпада, так як Марыя – за ўсё тое, што Ён здзейсніў у маім жыцці?