27.09.2013 - успамін св. Вінцэнта дэ Поля, святара

Лк 9, 18–22

Калі Езус маліўся ў самоце, вучні далучыліся да Яго. І спытаўся ў іх: Кім лічыць Мяне народ? Яны сказалі ў адказ: Янам Хрысціцелем, іншыя — Іллёю, некаторыя ж кажуць, што адзін з даўніх прарокаў уваскрос. Ён спытаўся ў іх:  А вы кім лічыце Мяне? І адказаў Пётр: Месіяй Божым. Але Ён строга загадаў ім нікому не казаць пра гэта, кажучы, што Сын Чалавечы павінен выцерпець шмат, што адкінуць Яго старэйшыны, першасвятары і кніжнікі, што Ён будзе забіты і на трэці дзень уваскрэсне.

А вы кім лічыце Мяне?... – шукаць штодня адказ на гэтае пытанне Збавіцеля ў сваім сэрцы пакліканы кожны хрысціянін… Больш таго, усё нашае жыццё з’яўляецца, можна сказаць, сведчаннем аб гэтым адказе…

Ці сапраўды магу шчыра вызнасць, што менавіта Хрыстос для мяне галоўны ў маім жыцці? Ці магу шчыра сказаць, што Ён – Месія, Той, які прыйшоў, каб служыць і аддаць жыццё сваё для адкуплення многіх; Той, які паказвае шлях праўды, справядлівасці і любові? Ці не паступаю як старэйшыны, першасвятары і кніжнікі – г.зн. адкідваючы навучанне Госпада, выкідваючы Яго са свайго жыцця і аддаючы Яго на смерць?...