19.07.2014 Субота XV звычайнага тыдня

Мц 12, 14–21

Забараніў ім расказваць пра Сябе, каб збылося сказанае

У той час: Фарысеі выйшлі і сабралі раду супраць Езуса, каб загубіць Яго.

Але Езус, даведаўшыся, пайшоў адтуль. І пайшло за Ім следам шмат людзей, і Ён аздаравіў усіх. Але забараніў ім расказваць пра сябе, каб збылося сказанае прарокам Ісаем:

Вось слуга Мой, якога Я выбраў,
умілаваны Мой, якога ўпадабала душа Мая.
Ускладу дух Мой на Яго,
а Ён абвесціць суд народам.
Не будзе пярэчыць і лямантаваць,
і не пачуе ніхто на плошчах голасу Яго.
Трысціны надламанай не пераломіць,
і кнота, які тлее, не пагасіць,
пакуль не давядзе суд да перамогі.
І ў імені Ягоным народы будуць мець надзею.

 

Сёння ў Евангеллі Ісус ізноў здзіўляе нас. Чытаем: “І пайшло за Ім следам шмат людзей, і Ён аздаравіў усіх. Але забараніў ім расказваць пра сябе”.

--Як гэта?! Але чаму? Гэта ж такая сенсацыя! Ды калі б з намі штосьці  такое адбылося, мы б ужо красаваліся ў тэленавінах, а нашыя паплечнікі давалі б інтэрв’ю сталічным выданням. Ды гэта ж колькі прыхільнікаў адразу можна было на свой бок прыцягнуць. Ну як так можна – упусціць такі рэкламны шанс! – лямантуе наша свядомасць.

…Так, усё так – тысячы прыхільнікаў забяспечаны, але спытаймася ў сябе: “прыхільнікаў чаго і каго”? Фокусаў, шоу, відовішча з факірам у галоўнай ролі? Задайма сабе пытанне: колькі чалавек сярод сведкаў Ісусавых аздараўленняў сапраўды ўсведамлялі, што перад імі – Месія? Колькі чалавек сярод іх сапраўды прыйшлі, каб “напіцца з крыніцы жывой вады”, бо распазналі ў ім – Хрыста? Нават, вучні да канца не ўсведамлялі сапраўднага значэння ўсяго, што з імі адбывалася.

І таму пазбягае Ісус фальшывай папулярнасці, бо патрэбныя яму не апладысменты і бойка за аўтографы, а душы, якія шукаюць Бога і гатовыя прыняць Яго; гатовыя ўбачыць Яго па-сапраўднаму, бо адкрытыя на прыняцце Божай праўды. А таксама тыя, хто прыняўшы гэтую праўду, будзе Яе верным сведкам. І сведчыць будуць не “лайкам” у “Фэйсбуку”, а сваім уласным жыццём.