Успамін Найсвяцейшай Панны Марыі з Гары Кармэль

Мц 12, 46–50

Працягнуўшы руку сваю да вучняў сваіх, сказаў: Вось маці Мая і браты Мае

У той час, калі Езус прамаўляў да людзей, Маці і браты Ягоныя стаялі звонку і хацелі пагаварыць з Ім. І нехта сказаў Яму: Вось Маці Твая і браты Твае звонку стаяць і хочуць пагаварыць з Табою.

Ён жа адказаў таму, хто звярнуўся да Яго: Хто маці Мая і хто браты Мае? І, працягнуўшы руку сваю да вучняў сваіх, сказаў: Вось маці Мая і браты Мае. Бо кожны, хто выконвае волю Айца Майго, які ёсць у небе, той Мне брат, і сястра, і маці.

Гэта слова Пана.

 У нашым жыцці, здараецца, таксама ўзнікае  пытанне: “Хто маці Мая і хто браты Мае?” Сёння Хрыстос адкрывае нам дзіўную таямніцу роднасці: існуе роднасць не па-крыві, а паводле любові і Духа. Роднасць, братэрства, якое нараджаецца з даверу і пошуку праўды. Езус называе  братамі Сваіх вучняў – аднадумцаў і верных паслядоўнікаў. Але не толькі іх. Прымаючы сэрцам праўду Божага Слова, і мы далучаемся сёння да сям’і дзяцей Божых,  робімся братамі Хрыста.

Будзьма ж вернымі гэтай роднасці, каб быць годнымі называць Госпада сваім Айцом.