03.09 -- успамін св. Грыгорыя Вялікага, папы і доктара Касцёла

Лк 4, 38–44

Таксама іншым гарадам Мне трэба абвяшчаць Добрую Навіну, бо для гэтага Я пасланы

У той час: Езус пакінуў сінагогу і прыйшоў у дом Сымона. Між тым моцная гарачка ахапіла Сымонаву цешчу. І прасілі Яго за яе.

Стаўшы над ёю, Езус забараніў гарачцы, і тая пакінула яе. Жанчына адразу ж паднялася і прыслугоўвала ім.

На захадзе сонца ўсе, хто меў хворых на розныя немачы, прыводзілі іх да Езуса. Ён жа, ускладаючы рукі на кожнага з іх, аздараўляў іх. І шмат з каго выходзілі злыя духі, якія крычалі, кажучы: Ты — Сын Божы! Але Ён забараняў і не дазваляў ім казаць, бо яны ведалі, што Ён Месія.

Калі настаў дзень, Езус выйшаў і скіраваўся ў пустыннае месца. А людзі шукалі Яго і, прыйшоўшы да Яго, затрымлівалі Яго, каб не сыходзіў ад іх.

Але Ён сказаў ім: Таксама іншым гарадам Мне трэба абяшчаць Добрую Навіну аб Валадарстве Божым, бо для гэтага Я пасланы.

І прапаведаваў у сінагогах Юдэі.

Сёння мы бачым Хрыста ў Яго  магутнай сіле, Хрыста як цудатворцу, які аздараўляе, выганяе злых духаў, прыносіць палёгку людзям. Бачым, што Ён  нікому не адмаўляе ў дапамозе, цалкам аддае сябе тым, хто прыходзіць, просячы ратунку. Дапамагае і тым, за каго просяць іншыя!

І людзі ідуць бясконцым патокам са сваімі патрэбамі, болем, хваробамі, апантанасцю. І тады, і цяпер – толькі з патрэбамі. І неяк зусім выпадае з-пад увагі, што мэта Ісуса зусім не ў тым, каб вылечыць усіх хворых (бывае, што хвароба спрыяе навяртанню і збаўленню чалавека). Яго мэта ў тым, каб абвяшчаць Добрую Навіну аб Валадарстве Божым. І абвяшчаць яе ўсім – і тым, хто “затрымлівае Яго, каб не сыходзіў”, і “іншым гарадам”, і нам, цяперашнім.

Толькі вось чалавек ніяк не “паддаецца” – яму даволі цудаў і аздараўленняў. А “Добрая Навіна”? Ды няма часу ў ёй разбірацца – не баліць нічога, і хопіць… Хопіць?

Што адкажам?