27 верасня — успамін св. Вінцэнта дэ Поля, святара

Лк 9, 43b–45

Сын Чалавечы будзе выдадзены ў рукі людзей

У той час: Калі ўсе здзіўляліся ўсяму, што рабіў Езус, Ён сказаў сваім вучням: Пакладзіце сабе ў вушы словы гэтыя, бо Сын Чалавечы будзе выдадзены ў рукі людзей.

Але вучні не зразумелі сказанага, таму што гэта было схавана ад іх, каб яны не спазналі. Запытацца ж у Яго пра сказанае баяліся.  

"Запытацца ж у Яго пра сказанае баяліся..."

Гэтак і мы, пачуўшы штосьці, што не адпавядае нашым чаканням, і, нават, пужае нас, баімся папрасіць тлумачэння. І не таму, што зразумелі няправільна, а менавіта таму, што "ўсё зразумелі", але вельмі не жадаем з гэтым згадзіцца. Паступаем так і ў штодзённым жыцці, і ў касцёле. 

Вядома, не ўсё можа быць асэнсавана адразу -- і Езус не казаў вучням ад пачатку ўсяго, што павінна з Ім адбыцца. Але прыйшоў час для іх пасталець і ўбачыць праўду адкрытымі вачыма. Яны ж -- баяліся...

Для кожнага з нас у жыцці настае нарэшце час: "пачуць і прыняць" або "спужацца і адкінуць".

Ці гатовыя мы выбіраць?