14.10 - аўторак 28 Звычайнага тыдня

Лк 11, 37–41

Давайце лепш міласціну, тады ўсё будзе ў вас чыстае

У той час, калі Езус гаварыў, адзін фарысей запрасіў Яго да сябе абедаць. Ён прыйшоў і ўзлёг за сталом. Фарысей жа здзівіўся, што Ён не абмыў рук перад абедам.

Але Пан сказаў яму: Цяпер вы, фарысеі, звонку ачышчаеце кубкі і місы, а нутро вашае напоўнена драпежнасцю і злосцю. Неразумныя, ці не той, хто стварыў вонкавае, стварыў і тое, што ўнутры? Давайце лепш міласціну з таго, што ўнутры вас, тады ўсё будзе ў вас чыстае.

Нутро вашае напоўнена драпежнасцю і злосцю… Хрыстос гэтыя словы кіруе да чалавека, які не быў апошняй асобай ў грамадстве. Наадварот, фарысеі лічыліся рэальнай рэлігійнай і палітычнай сілай у Ізраілі.

Цяпер вы, фарысеі, звонку ачышчаеце кубкі і місы – Госпад паказвае, што самай вялікай праблемай фарысеяў з’яўляецца крывадушнасць і маральная шызафрэнія, бо што толку з таго што кубак ці міска чыстыя толькі знешне, а ўнутры – поўныя бруду?...

Калі хочам пазбегнуць пасткі фарысейства, неабходна напоўніць сваё сэрца сардэчнасцю і дабром, крыніца якіх – у Ім, Адкупіцелю чалавецтва… Толькі так зможам жыць па-сапраўднаму, а не толькі рабіць выгляд, што жывём; зможам жыць верай, якая дзейнічае праз любоў.